لاہور ( سپورٹس رپورٹر) پاکستان کرکٹ ٹیم کے کوچنگ سٹاف اور مینجمنٹ کمیٹی کے تقرر کے حوالے سے اگلا ہفتہ انتہائی اہم قرار دیا جا رہا ہے۔پی سی بی کی عبوری مینجمنٹ کمیٹی کے سربراہ نجم سیٹھی سابق کوچ مکی آرتھر کو دوبارہ پاکستان کرکٹ ٹیم کا کوچ تعینات کرنے کے خواہشمند تھے تاہم انہوں نے معذرت کر لی تھی۔جسٹس لینگر کا نام سامنے آ رہا تھا لیکن جسٹن لینگر جتنی رقم ایک سیشن میں حاصل کر لیتے ہیں اتنی انہیں پاکستان میں ایک ماہ میں بھی نہیں مل سکتی تو ایسی صورت میں وہ کیوں کر پاکستان آنے میں دلچسپی لیں گے۔اینڈی فلاور کا نام بھی سامنے آ رہا ہے لیکن وہ بھی پورا سال لیگ کرکٹ میں مصروف رہتے ہیں اور بہت زیادہ معاوضہ حاصل کر لیتے ہیں جبکہ ٹام موڈی سے بھی اس طرح رابطہ نہیں کیا گیا ۔ نجم سیٹھی مصروف تھے لیکن اگلے ہفتے سے مینجمنٹ، کوچنگ سٹاف اور سلیکشن کمیٹی کے حوالے سے معاملات واضح ہونا شروع ہو جائیں گے۔ذرائع کا کہنا ہے کہ امید یہی ظاہر کی جا رہی ہے کہ پی ایس ایل سے قبل ہی قومی ٹیم کے چیف سلیکٹر اور کوچنگ سٹاف کا معاملہ حل ہو جائیگا کیونکہ پی ایس ایل کے فوری بعد پاکستانی ٹیم نے نیوزی لینڈ کیخلاف 5 ون ڈے اور 5 ٹی ٹونٹی میچز پر مشتمل سیریز کھیلنی ہے۔