فیصل آباد‘ سیالکوٹ (نامہ نگار+ نمائندہ خصوصی) ڈمپر اور ایوری ڈبہ چونڈہ ظفروال روڈ پر جھاٹو کے قریب تیزرفتاری اور دھند کے باعث ٹکرانے سے 38 سالہ ڈرائیور فدا حسین موقع پر ہی جاں بحق ہو گیا جبکہ 26 سالہ نجمہ‘ 29 سالہ فائزہ اور چار سالہ حسنین زخمی ہوگئے۔ زخمیوں کو ریسکیو 1122 کے جوانوں نے تحصیل ہسپتال منتقل کر دیا، جہاں نجمہ اور فائزہ دم توڑ گئیں۔ چار سالہ حسنین کی حالت بھی تشویشناک بیان کی جاتی ہے۔ شیخوپورہ کے علاقہ گھنگ کے رہائشی تین سگے بھائی پچیس سالہ سٹیفین، بائیس سالہ میرون اور انیس سالہ شیرون ولد اجمل گل اپنے ڈرائیور بیس سالہ عرفان  کے ہمراہ کار پر فیصل آباد آ رہے تھے کہ اڈہ بلوچنی کے قریب تیز رفتار کار گاڑی کو اوورٹیک کرتے ہوئے بے قابو ہو کر دیوار سے ٹکرا گئی جس کے نتیجے میں کار سوار چاروں افراد شدید زخمی ہو گئے۔ بائیس سالہ میرون اور انیس سالہ شیرون موقع پر ہی جانبحق ہو گئے جبکہ تیسرے بھائی سٹیفن اور ڈرائیور عرفان کو تشویشناک حالت میں ہسپتال منتقل کر دیا گیا ہے۔