لاہور ( سپورٹس رپورٹر) سکواش کے سابق عالمی چیمپئن جان شیر خان کی سوشل میڈیا پر وائرل ویڈیو جھوٹ پر مبنی نکلی۔سکواش لیجنڈ کے بہنوئی نے خبر کی تردید کرتے ہوئے کہا کہ سابق عالمی چیمپئن کسی ایسی خاص بیماری یا پریشانی میں مبتلا نہیں۔جان شیر خان کے حوالے سے وائرل ہونے والی ویڈیو کے سبب سکواش لیجنڈ کے عزیز و اقارب اور لاکھوں چاہنے والے مداح شدید کوفت اور ذہنی اذیت کا شکار ہوگئے۔جان شیر خان کے بہنوئی اور سابق کوچ محبوب خان نے رابطہ پر پشاور سے بتایا کہ جان شیر خان بخیریت و عافیت ہیں۔ان کا کہنا تھا کہ کسی نے مسجد میں عبادت کے دوران 8مرتبہ کے عالمی چمپئن اور 6مرتبہ برٹش اوپن سکواش چیمپئن شپ شپ جیتنے والے جان شیر خان کی ویڈیو بنا کر غلط پیغام دیا ہے، جس کی وجہ سے جان شیر خان، ان کے رشتے داروں اور محبت کرنے والوں کو سخت تکلیف اور پریشانی کا سامنا کرنا پڑا۔