لاہور (این این آئی) کائونٹر ٹیررزم ڈیپارٹمنٹ نے لاہور سمیت پنجاب کے مختلف علاقوں میں کارروائیوں کے دوران 12مشتبہ افراد کو گرفتار کر لیا۔ حکام کے مطابق گرفتاریاں مستی گیٹ لاہور، صادق آباد، جہلم، خوشاب اور گجرپورہ کے علاقوں میں کومبنگ آپریشن کے دوران عمل میں لائی گئیں۔ گرفتار مشتبہ افراد سے 2پسٹل اور دھماکہ خیز مواد برآمد ہوا۔ گرفتار افراد کے خلاف 5مقدمات درج کئے گئے۔ حکام کے مطابق کومبنگ و سرچ آپریشن کے دوران 48 مقامات کو چیک کیا گیا، 414افراد کی بائیو میٹرک تصدیق کی گئی اور 3277افراد سے پوچھ گچھ کی گئی۔ حکام نے کہا کہ ریاست دشمن عناصر کو سلاخوں کے پیچھے پہنچانے میں کوئی کسر نہیں چھوڑی جائے گی ۔