شیخوپورہ (نمائندہ خصوصی) تحریک انصاف کے ضلعی سینئر نائب صدر میاں افضال حیدر کی قیادت میں سویڈن اور ہالینڈ میں قرآن پاک کی بے حرمتی کیخلاف  مظاہرہ کیا گیا جس میں تحریک انصاف اور دیگر سیاسی جماعتوں رہنمائوں، تاجروں سمیت معززین کی بڑی تعداد موجود تھی۔ ریلی صدر چوک سے شروع ہوکر لیاقت ہائی سکول چوک پہنچ کر اختتام پذیر ہوئی۔ میاں افضال حیدر نے کہاکہ سویڈن میں ہونے والی قرآن مجید کی بے حرمتی سے دنیا بھر کے مسلمانوں کی دل آزاری ہوئی ہے۔  عمران خان نے جس طرح اقوام متحدہ میں عالم اسلام کی ترجمانی کی تھی اور تمام دنیا کے حکمرانوں کے سامنے اسلام کا دفاع کیا تھا آج ان جیسے لیڈر کا نہ ہونا بھی مسلمانوں کیلئے باعث افسوس ہے۔ اس واقعہ کی جتنی مذمت کی جائے وہ کم ہے۔ ایسے اقدامات کے خلاف مسلمان ممالک کو کھڑا ہونا چاہئے۔ وزیر آباد میں بھی ریلیاں نکالی گئیں۔