سمبڑیال (نمائندہ نوائے وقت) سمبڑیال نیو دارالسلام میں گیس کی قلت عروج پر ہے۔ دو ماہ سے جاری مسئلہ صارفین کے لئے درد سر بن گیا۔ انسپیکشن ٹیمیں زبانی جمع خرچ کر کے رپورٹ دینے لگیں۔ پریشر بڑھانے کے باوجود گیس جاتی کہاں ہے۔ سوئی گیس حلقہ انچارج سر پیٹ کر بیٹھ گیا۔ نیو دارالسلام میں دو ماہ سے زائد عرصہ میں گیس کی قلت کے بارے میں لگاتار شکایات آنے کے بعد انسپکشن ٹیموں کے وزٹ کرنے کے باوجود گیس کا مسئلہ ابھی تک حل نہیں ہو پا رہا۔ گیس کی سپلائی کی رکاوٹ سے گھریلو خواتین شدید مشکلات کا شکار ہیں۔ سکول جانے والے بچے اور ملازمت پیشہ افراد ناشتہ کئے بغیر جانے پر مجبور ہیں۔