خانیوال (نیوز رپورٹر‘ نمائندہ خصوصی‘ نامہ نگار) ایم فور موٹروے پر شادی کی تقریب میں شرکت کے لئے جانے والی باراتیوں کی مسافر وین ڈیوائڈر سے ٹکرا گئی۔ تین افراد موقع پر جاں بحق، دس زخمی ہو گئے۔ حادثہ ڈرائیور کو نیند آنے کے باعث پیش آیا۔ زخمیوں میں وین ڈرائیور بھی شامل ہے۔ موٹر وے ایم فور پر شام کوٹ انٹرچینج سے 14 کلو میٹر ملتان کی جانب مسافر وین نمبر KBI 109 ڈرائیور کو نیند آجانے کے باعث ڈیوائڈر سے ٹکرا گئی۔ حادثے میں 3 افراد اللہ دتہ ولد غلام محمد، یامین ولد صابر اور خالد ولد نصیر شدید زخموں کی تاب نہ لاتے ہوئے موقع ہی پر جاں بحق ہو گئے۔ جبکہ 10 افراد زخمی ہوگئے۔ مسافر وین حافظ آباد سے علی پور جارہی تھی کہ حادثہ کا شکار ہو گئی۔ زخمیوں میں ڈرائیور شہزاد ولد انور، علی ولد ریاست علی، ریحان ولد اللہ دتہ، امجد ولد وسیم، عصمہ بی بی ولد رمضان، داود ولد رمضان، آکاش ولد فاروق، یاسین ولد صابر، رمضان ولد گلزار، عمیر ولد ساجد علی، اویس ولد رمضان اور ابوبکر ولد رمضان شامل ہیں۔