پی ایس ایل 8کے شایان شان افتتاح کی تیاریاں عروج پر پہنچ گئیں
لاہور (سپورٹس رپورٹر) پاکستان سپر لیگ(پی ایس ایل 8)کے شایان شان افتتاح کی تیاریاں عروج پر پہنچ گئیں جب کہ ملتان کو میگا تقریب کیلئے دلہن کی طرح سجانے کا عزم ظاہر کردیا گیا۔ پی ایس ایل کے آٹھویں سیزن کی افتتاحی تقریب ملتان میں منعقد ہوگی۔ 13فروری کو ملتان کرکٹ سٹیڈیم میں ہونے والی اس رنگارنگ تقریب میں دنیا بھر کے نامور کرکٹرز شریک ہوں گے۔افتتاح کو چارچاند لگانے کیلئے جہاں پاکستان کرکٹ بورڈ کی جانب سے اقدامات کیے جارہے ہیں وہیں پر ملتان ویسٹ مینجمنٹ کمپنی نے بھی شہر بھر کو دلہن کی طرح سجانے کا عزم ظاہر کردیا ہے۔ سٹیڈیم اور اس کے اطراف کی صفائی کی جارہی ہے، وینیو کو بھی سجایا جائے گا۔ کمپنی کے آفیشل شکیل احمد کا کہنا تھا کہ افتتاحی تقریب ملتان کیلئے ایک بہت بڑا اعزاز ہے۔ اس ایونٹ کیلئے مثالی اقدامات کیے جارہے ہیں۔ سٹیڈیم اور اس کے اطراف ہی نہیں بلکہ پورے شہر کو صاف کرنے کے ساتھ سجایا بھی جائے گا۔ پلیئرز کے آنے سے پہلے تمام کام مکمل ہوجائیں گے۔
