لاہور(سپورٹس رپورٹر)انٹرنیشنل اسپیشل اولمپک کینیڈا کے ہیڈ کوچ گلین کرڈن ایک ہفتے کے دورے پر کراچی پہنچ گئے جہاں وہ سپیشل اولمپک ورلڈ گیمز کیلئے پاکستانی کوچز کو تربیت فراہم کریں گے۔ کراچی آمد پر سپیشل اولمپک پاکستان کی چیئرپرسن رونق لاکھانی و دیگر عہدیداران نے گلین کرڈن کا استقبال کیا۔ واضح رہے کہ رواں سال جرمنی کے شہر برلن میں 17 تا 25 جون تک کھیلے جانے والے سپیشل اولمپک ورلڈ گیمز کی تیاریوں کے سلسلے میں قومی کھلاڑیوں کا تربیتی کیمپ کراچی پورٹ ٹرسٹ سپورٹس کمپلیکس میں لگایا گیا۔ہیڈ کوچ گلین کرڈن نے رونق لاکھانی کے ہمراہ کیمپ کا دورہ کر کے کوچز اور کھلاڑیوں کی کارکردگی کا جائزہ لیا۔اس موقع پر گلین کارڈن کا کہنا تھا کہ پاکستان میں آ کر بہت خوشی محسوس ہوئی اور یہاں کی میزبانی کو انجوائے کر رہا ہوں۔ یہ ملک کھیلوں کے حوالے سے دنیا بھر میں اپنا مقام رکھتا ہے، کوچنگ سیمینار پاکستانی کوچز کیلیے بہت مفیدث ثابت ہوگا جس سے استفادہ کرنے والے کوچز مستقبل میں اسپیشل ایتھلیٹس کی بہترین تربیت اور رہنمائی کرسکیں گے اور اس کی روشنی میں پاکستان کے اسپیشل ایتھلیٹس کی کارکردگی مزید بہتری کی جانب گامزن ہوگی۔گلین کارڈن کا مزید کہنا تھا کہ سپیشل ایتھلیٹس ہمارے لیے انسپریشن ہیں ہیں، یہ بچے اپنے کھیل کو دل و جان سے کھیلتے ہیں۔ مجھے پاکستانی ایتھلیٹس میں جیت کا جذبہ نظر آرہا ہے۔ مجھے امید ہے کہ یہ سپیشل ورلڈ گیمز میں اپنے ملک کیلئے بہترین کارکردگی کا مظاہرہ کریں گے۔ اس موقع پر چیئرپرسن سپیشل اولمپک پاکستان رونق لاکھانی کا کہنا تھا کہ گلین کارڈن کی پاکستان آمد ہمارے لیے باعث اعزاز ہے۔