لاہور (سپورٹس رپورٹر) پاکستان کرکٹ ٹیم کا چارج سنبھالنے کے بعد مشہور کوچ مکی آرتھر نے امارات انٹرنیشنل لیگ کے معیار کو خطے کا گیم چینجر قرار دیدیا ۔مکی آرتھر کا خیال ہے کہ صف اول کے غیر ملکی کرکٹرز اور مایہ ناز کوچز اماراتی ٹیم کو ورلڈ کلاس ٹیم بنا دیں گے۔پاکستانی کرکٹ ٹیم کے ممکنہ ڈائریکٹر مکی آرتھر کا کہنا ہے کہ امارات میں ہونے والے انٹرنیشنل لیگ سے متحدہ عرب امارات کو مضبوط ٹیم تشکیل دینے میں مدد ملے گی۔ اس سے مقامی ٹیلنٹ کو گروم کرنے میں بھی مدد مل رہی ہے۔مکی آرتھر نے کہا کہ امارات میں غیر ملکیوں کی بڑی تعداد موجود ہے لیکن اس لیگ سے امارات کرکٹ بورڈ کو فائدہ ہو گا۔ ٹورنامنٹ میں ٹاپ کے کوچز ہیں جو کھلاڑیوں کے ٹیلنٹ کو نکھارنے میں مدد دیں گے۔ یہاں پریشر کے بغیر کرکٹ دیکھنے کا مزہ ہی کچھ اور ہے۔ امارات میں شاندار ٹورنامنٹ ہو رہا ہے جس میں مشہور کوالٹی کے کھلاڑی ایکشن میں ہیں، اماراتی کرکٹ کو میں شارجہ کے دور سے فالو کر رہا ہوں لیکن آئی ایل لیگ میں مقامی ٹیلنٹ کو دیکھ کر خوشی ہورہی ہے۔ مصطفی نامی بیٹر کمال کا کھلاڑی ہے۔ دنیا بھر میں لیگز ہو رہی ہیں جس سے مقامی ٹیلنٹ کو فائدہ ہو رہا ہے، پاکستان اور بھارت اس کی بہترین مثال ہیں۔واضح رہے کہ آئی ایل ٹی ٹوئنٹی کے پلے آف کل سے شروع ہوں گے اور فائنل اتوار کو ہوگا،فاتح ٹیم 7 لاکھ ڈالرز اور رنرز اپ 3 لاکھ ڈالرز کی حقدار ہوگی۔