لاہور (نوائے وقت رپورٹ+نمائندہ خصوصی) خانیوال میں سی ٹی ڈی کا دہشت گردوں سے مقابلہ ہوا، راولپنڈی کار دھماکے کا ماسٹر مائنڈ انتہائی مطلوب دہشت گرد عرفان اللہ ہلاک، ہلاک دہشت گرد ملک بھر میں ایف سی کے کئی جوانوں کی شہادت میں ملوث تھا۔ سی ٹی ڈی ملتان کو مصدقہ ذرائع سے معلومات ملی کہ دہشت گردوں کا ایک گروہ گھناؤنی دہشت گردی کی کارروائیوں میں ملوث رہا ہے جو خانیوال کے آس پاس موجود ہے اور ایل ای اے کے خلاف بڑی دہشت گردی کی کارروائی کرنے کی منصوبہ بندی کر رہا ہے۔  جس پر سی ٹی ڈی ٹیم کارروائی کے لیے پہنچ گئی، جہاں دہشت گردوں نے سی ٹی ڈی ٹیم پر  اندھا دھند فائرنگ شروع کر دی۔ بیس منٹ تک فائرنگ کا تبادلہ ہوا  فائرنگ بند ہونے پر سی ٹی ڈی ٹیم نے علاقے کی تلاشی لی تو 1 دہشت گرد اپنے ہی ساتھیوں کی فائرنگ سے ہلاک ہوا  پڑا ملا، جس کے قبضہ سے کلاشنکوف، دستی بم اور دیگر سامان برآمد کیا گیا ہے۔  جبکہ 3 نامعلوم دہشت گرد اندھیرے کا فائدہ اٹھا کر فرار ہونے میں کامیاب ہو گئے۔