لاہور(سپورٹس رپورٹر+نامہ نگار)پاکستان سپر لیگ کے آٹھویں ایڈیشن کیلئے نئی ٹرافی متعارف کرانے کا فیصلہ کیا گیا ہے جس کی رونمائی آج ہو گی۔ ٹرافی کو پہلے سے زیادہ دیدہ زیب بنانے کی کوشش کی گئی ہے، ٹرافی کے سٹار کو 24قیراط سونے سے تیار کیا گیا ہے، ٹرافی کی رونمائی لاہور کے تاریخی شالیمار باغ میں کی جائیگی، پاکستان کرکٹ بورڈ کی مینجمنٹ کمیٹی کے چیئرمین نجم سیٹھی ٹرافی کی رونمائی کریں گے۔ تقریب میں پی ایس ایل فرنچائزز کے کپتان بھی شریک ہوں گے،واضح رہے کہ پاکستان سپر لیگ 8کی افتتاحی تقریب 13فروری کو ملتان میں ہو گی۔پاکستان سپر لیگ کے آٹھویں ایڈیشن کیلئے سکیورٹی کے انتظامات مکمل کرلئے گئے ہیں۔میگا ایونٹ میں شریک ٹیموں اور میچ آفیشلز کو سٹیٹ گیسٹ کا درجہ دیدیا گیا جبکہ غیر ملکی کمنٹیٹرز، عمائدین، و پروڈکشن سٹاف کو وی آئی پی کا درجہ دیا گیا ہے،پی ایس ایل 8کے انعقاد کیلئے فول پروف سکیورٹی انتظامات کیے جارہے ہیں۔ محکمہ داخلہ پنجاب نے آئی جی پنجاب، ایڈیشل آئی جی آپریشن پنجاب، سی سی پی او لاہور سمیت راولپنڈی، ملتان کے ریجنل و سٹی پولیس افسران کو مراسلہ ارسال کردیا ہے جس میں کہا گیا ہے سکیورٹی حصار تشکیل دیکر سخت ترین حفاظتی انتظامات یقینی بنائے جائیں،انٹیلی جنس ایجنسیوں، فوج اور رینجرز کیساتھ کوارڈینیشن رکھ کر کھلاڑیوں و آفیشلز کو ایئرپورٹ اور سٹیڈیم کے درمیان قیام اور نقل و حرکت کے دوران بھی فول پروف سکیورٹی فراہم کی جائے،راولپنڈی، لاہور اور ملتان میں داخل ہونے والی بسوں اور ٹرکوں سمیت تمام گاڑیوں کی مکمل چیکنگ کی جائے۔
، پولیس اور سکیورٹی اہلکار ڈیوٹی کے دوران اپنے نام کے ٹیگ و سکیورٹی کارڈ لازمی آویزں رکھیں ورکشاپس، پیٹرول پمپس، بس سٹاپ، بس اور ٹرک اڈوں پارکنگ سٹینڈز، پبلک پارکنگ ایریاز، پارکنگ پلازہ اور دیگر ایسی جگہوں کی مکمل سکریننگ کی جائے۔کسی بھی ناخوشگوار صورتحال کی صورت میں نمٹنے و کرائوڈ کو کنٹرول کرنے کی خاطر مختلف مقامات پر اینٹی رائٹس فورس تعینات رکھی جائے اور ٹورنامنٹ کے دوران ٹریفک کو رواں دواں رکھنے کیلئے بھی خصوصی انتظامات یقینی بنائیں جائیں۔