فا ئرنگ ، الیکشن ڈیوٹی پر تعینات ڈرائیور شہید، 3لیویز اہلکار زخمی : مردان ، مقابلہ 2دہشتگرہلاک
ڈیرہ بگٹی‘ نوشہرہ (این این آئی‘ نوائے وقت رپورٹ) ڈیرہ بگٹی میں بلدیاتی الیکشن ڈیوٹی پر تعینات لیویز اہلکاروں کے قافلے پر نامعلوم افراد کی فائرنگ سے ڈرائیور شہید‘ تین اہلکار زخمی ہوگئے۔ لیویز حکام کے مطابق نواحی علاقے لوپ میں بلدیاتی الیکشن کے سلسلے میں ریٹرننگ آفیسر اور انتخابی عملے کی حفاظت پر مامور لیویز آفیسر‘ لیویز فورس کے قافلے پر نامعلوم مسلح افراد نے فائرنگ کردی۔ شہید ڈرائیور کی نعش اور زخمی اہلکاروں کو سول ہسپتال منتقل کر دیا جہاں ابتدائی طبی امداد کے بعد شدید زخمی ہونے والے اہلکاروں کو شیخ زید ہسپتال رحیم یار خان منتقل کر دیا گیا جبکہ لیویز اور دیگر قانون نافذ کرنے والے اداروں نے مزید تفتیش شروع کر دی۔ سی ٹی ڈی مردان ریجن نے نوشہرہ کے علاقے مصری بانڈہ میں کارروائی کی۔ فائرنگ کے تبادلے میں 2 دہشت گرد ہلاک جبکہ 3 فرار ہو گئے۔ سی ٹی ڈی کے مطابق دہشت گرد متعدد مقدمات میں مطلوب تھے۔ ہلاک دہشت گردوں سے 2 پستول‘ دستی بم اور موٹرسائیکل برآمد کی گئی ہے۔
