لاہور(سپورٹس رپورٹر)پشاور زلمی اور قومی ٹیم کے کپتان بابر اعظم نے بتایا کہ خواہش ہے کہ عمران خان کی طرح قومی ٹیم کی قیادت کرتے ہوئے پاکستان کو دوسری مرتبہ ورلڈ کپ چیمپئن کے مقام تک پہنچاؤں۔انہوں نے کہا کہ شدید خواہش ہے کہ ملک اور قوم کیلئے بھارت میں ہونے والا ورلڈ کپ جیت کر لائیں، آپ کو کئی انفرادی چیزیں بھی نظر آئیں گی لیکن میرا گول صرف ایک ہے کہ ہم ورلڈ کپ جیت کر آئیں۔ رواں برس ورلڈ کپ کی تیاری کیلئے ہمیں کافی ون ڈے کرکٹ کھیلنے کو ملے گی، مقاصد کے حصول اور منزل پر پہنچنے کیلئے قدم بہ قدم آگے بڑھنے کی ضرورت ہوتی ہے ، آپ ایک دم جست لگا کر اپنے مقصد یا منزل تک نہیں پہنچ سکتے۔ مائنڈسیٹ تو قدم بہ قدم آگے بڑھنے کا ہے لیکن اس کیلئے بھی ذہن میں یہ بات بٹھانا ضروری ہے کہ ہمیں سخت محنت اور بہترین پلاننگ کے ساتھ بہترین پرفارمنس کا مظاہرہ کرنا ہوگا۔