لاہور(سپورٹس رپورٹر)پاکستان سپر لیگ ٹیم کراچی کنگز کے کپتان عماد وسیم نے کہا ہے کہ بابر اعظم کی کراچی کنگز کیلئے کافی خدمات ہیں جس کو نظر انداز نہیں کیا جاسکتا لیکن پلیئرز آتے جاتے رہتے ہیں، ٹیموں کو آگے بڑھنا پڑتا ہے، کراچی کنگز بھی آگے بڑھ چکی ہے۔کپتان کون ہے، یہ ٹیم مالکان کا معاملہ ہے،  ایمرجنگ کھلاڑی بھی ایک روز سپر سٹار بن جاتا ہے، ایک پلیئر کے جانے سے جو خلا ہوتا ہے وہ پر ہو ہی جاتا ہے۔ پاکستان کا کلچر پوری دنیا میں دکھا سکتے ہیں۔ پی ایس ایل کیلئے غیر ملکی کھلاڑی بھی کافی پرجوش ہیں، لیگ نے انٹرنیشنل ٹیموں کو کھلاڑی دیئے ہیں ۔کراچی کنگز کے پاس بہترین کھلاڑی ہیں ۔کیونکہ جو یہاں پرفارم کرتا ہے اس کی دنیا میں مانگ بڑھ جاتی ہے، اس لیے پلیئرز کی کوشش ہوتی ہے کہ وہ پی ایس ایل میں آکر پرفارم کریں، اب دنیا کے ٹاپ پلیئرز آرہے ہیں اور ہر کوئی مانتا ہے پی ایس ایل سخت ترین ایونٹ ہے۔جہاں بھی دنیا میں جاکر کھیلتا ہوں، یہی دیکھا ہے کہ جہاں مقامی پلیئرز مضبوط ہوتے ہیں وہ لیگ اچھی ہوتی ہے، پی ایس ایل میں ایسا ہی ہے، یہ ایک الگ لیول کی لیگ ہے، ہر ٹیم کے پاس زبردست مقامی کھلاڑی ہیں اس لیے یہ لیگ کافی ٹف ہے۔ محمد عامر اہم بائولر ہیں، پچھلے سال زخمی ہوگئے تھے اس سال وہ کافی کرکٹ کھیلتے آرہے ہیں، ان کا ورک لوڈ دیکھیں گے، شعیب ملک اہم پلیئر ہیں، ان کے مشورے میرے لیے کافی اہم ہوں گے۔ ان کیلئے اچھی بات ہے زیادہ میچز کراچی میں ہورہے ہیں، 12 واں کھلاڑی یہاں کا کراؤڈ ہوگا، اگر اچھا آغاز ہوا تو فائدہ مند ہوگا۔ ہر کپتان کا اپنا انداز ہے، میں جارح انداز میں کپتانی کرتا ہوں، ٹی ٹونٹی پوری دنیا میں کھیلتا ہوں اور جو سیکھتا ہوں اس کو اپلائی کرنے کی کوشش کرتا ہوں، جیت ہار ہمارے ہاتھ میں نہیں لیکن اگر مثبت کھیلتے ہیں تو رزلٹ ملتے ہیں۔میرا نہیں خیال کہ پشاورہمارا حریف ہے، کراچی لاہور کی تو نیچرل ہے لیکن پشاور زلمی سے ایسا کچھ نہیں، ہمارے لیے ہر میچ اہم ہے جس کے خلاف بھی کھیلیں، ہم پروفیشنل کرکٹرز ہیں، ہمیں ہر میچ میں فائٹ کرنا ہے۔ جب محمد رضوان کراچی کنگز میں تھے تو اس وقت کے آپشنز کو دیکھ کر رضوان کی جگہ نہیں بن رہی تھی، اس وقت بابر، ایلیکس ہیلز اور شرجیل تھے، خوشی ہے کہ رضوان دوسری فرنچائز میں گیا اور خود کو ثابت کردیا اور دوسروں کو غلط ثابت کیا۔ بطور کھلاڑی یہی خواہش ہوتی ہے پاکستان کیلئے کھیلیں، عزت اور وقار کیساتھ کھیلنا چاہتا ہوں اور ہمیشہ عزت کیساتھ ہی کھیلوں گا تاہم فی الحال فوکس پاکستان سپر لیگ میں اپنی فرنچائز کیلئے اچھا کرنے پر ہے، اس سے آگے کی نہیں سوچ رہا۔