اسلام آباد (نامہ نگار) ملک کی صف اول کی جامعہ کامسیٹس یونیورسٹی کے امتحان میں اسلامی اقدار کے برخلاف بہن بھائی کے مقدس رشتے بارے غلط سوال دئیے جانے پر ملک بھر شدید غم و غصہ پایا جانے لگا جبکہ پارلیمنٹرین کی جانب سے معاملہ ایوان میں اٹھانے کا اعلان کر دیا ہے۔ کامسیٹس یونیورسٹی انتظامیہ نے کسی بھی ممکنہ ردعمل سے بچنے کے لئے سوال بنانے والے وزیٹنگ لیکچرار کو نوکری سے نکال کر بلیک لسٹ قرار دے دیا۔ دوسری جانب وزارت سائنس اینڈ ٹیکنالوجی کے وزیر کے علم میں معاملہ آنے پر انہوں نے ایکشن لینے کے لئے جامعہ کو مراسلہ لکھ دیا جس پر یونیورسٹی نے کمال مہارت کا ثبوت دیتے ہوئے کہا کہ ہم پہلے ہی اس پر ایکشن لے چکے ہیں۔