اسلام آباد؍ کراچی (نامہ نگار+نوائے وقت رپورٹ+آئی این پی ) وزیر خارجہ اور چیئرمین پاکستان پیپلز پارٹی بلاول بھٹو زرداری 3 روزہ دورہ یورپ مکمل کر کے وطن واپس پہنچ گئے۔ بلاول بھٹو زرداری وفد کے ہمراہ خصوصی طیارے میں ہنگری سے کراچی پہنچے۔ وزیر خارجہ نے 3 روزہ دورہ یورپ کے دوران جرمنی، برطانیہ اور ہنگری میں اہم ملاقاتیں کیں۔ وزیر خارجہ نے کہا کہ ہنگری نے پاکستانی طلباء کیلئے تعلیمی وظائف کی تعداد 200 سے بڑھا کر 400 کر دی۔ سماجی رابطے کی ویب سائٹ ٹوئٹر  پر اپنے بیان میں وزیر خارجہ بلاول بھٹو زرداری نے کہا کہ پاکستان اور ہنگری کے مابین تعلیم کھیل اور سفارتی  اکادمیوں کے مابین تعاون کی یادداشتوں پر دستخط ہوئے۔ دریں اثناء بلاول بھٹو زرداری نے حیدر آباد کے پارٹی رہنما شاہد اقبال کے انتقال پر دکھ کا اظہار کیا اور کہا کہ غمزدہ خاندان کے غم میں برابر کا شریک ہوں۔