لاہور(سپورٹس رپورٹر) پاکستان کرکٹ بورڈ نے ویمنز لیگ کے 3 نمائشی میچوں کی تفصیلات جاری کر دی ہیں۔نمائشی میچ 8، 10 اور 11مارچ کو راولپنڈی کرکٹ سٹیڈیم میں کھیلے جائیں گے، دو ٹیمیں ایمازونز اور سپر وومین حصہ لیں گی، میچز سہ پہر 2 بجے سے شروع ہونگے جو پی ایس ایل کے میچوں سے قبل ختم ہونگے۔پی ایس ایل کے 3 دن کے میچوں کے ٹکٹس خواتین کے میچز کیلئے بھی کارآمد ہونگے، خواتین کا دن منانے کیلئے بدھ کو ٹی ٹونٹی میچ اور پنک ربن  چھاتی کے کینسر سے متعلق آگاہی پیدا کرنے کیلئے جمعہ کو دوسرا نمائشی میچ کھیلا جائیگا، ہفتہ کو تیسرا اور آخری نمائشی میچ کھیلا جائیگا۔ تینوں میچوں کیلئے میچ آفیشلز کا بھی اعلان کر دیا،ریفرنگ کے فرائض محمد انیس سرانجام دیں گے، شوزب رضا 8 مارچ کو پہلے ٹی ٹونٹی میچ کیلئے سلیمہ امتیاز کو آن فیلڈ امپائر کے طور پر جوائن کرینگے، طارق رشید تھرڈ امپائر اور حمیرا فرح فورتھ امپائر ہونگی۔دوسرے میچ کیلئے شوزب رضا اور حمیرا فرح آن فیلڈ امپائر ہونگے، طارق رشید اور سلیمہ امتیاز تھرڈ اور فورتھ امپائرنگ کے فرائض سرانجام دینگے جبکہ تیسرے میچ کیلئے طارق رشید اور سلیمہ امتیاز آن فیلڈ امپائر، شوزب رضا اور حمیرا فرح تھرڈ اور فورتھ امپائرنگ کے فرائض انجام دیں گے۔