لاہور؍ بھوئے آصل‘ سیالکوٹ (نامہ نگاران) سیالکوٹ کے درانی ٹائون میں گھریلو ناچاقی پر خاوند نے فائرنگ کر کے بیوی کو قتل کرنے کے بعد سر میں گولی مار کر زندگی کا خاتمہ کر لیا۔ تھانہ حاجی پورہ سیالکوٹ کے علاقہ درانی ٹائون میں محمود بٹ کا اپنی بیوی سیما محمود سے جھگڑا ہو گیا۔ ایک بیٹی ہے۔ اطلاع ملنے پر ڈی پی او سیالکوٹ‘ ڈی ایس پی اور ایس ایچ او سمیت دیگر پولیس افسر موقع پر پہنچ گئے۔ نعشوں کو قبضہ میں لیکر کارروائی شروع کر دی۔ نواحی گاؤں ہندال کے رہائشی عبدالطیف کے 16 سالہ بیٹے عبدالرزاق نے جو گھر میں اکیلا موجود تھا خود کو فائر مار کر خودکشی کر لی جبکہ گھر والوں نے کسی قسم کی کارروائی سے انکار کر دیا، تاہم خودکشی کی وجہ معلوم نہ ہو سکی۔ پولیس نے ضروری کارروائی کے بعد نعش ورثا کے حوالے کر دی۔ لیاقت چوک کے رہائشی 40 سالہ طاہر نے مبینہ طور پر گھریلو حالات سے دلبرداشتہ ہو کر خود کو گولی مار کر خودکشی کر لی ہے۔ نعش پوسٹمارٹم کیلئے مردہ خانے منتقل کر دی گئی۔