لاہور(سپورٹس رپورٹر)انگلینڈ کی تجربہ کار خاتون کرکٹر ڈینی ویاٹ نے کہا ہے کہ دنیا بھر میں ویمن کرکٹ لیگز کا انعقاد خواتین کرکٹرز کیلئے بہت اہم ہے، خواتین کرکٹرز کا کھیل بہتر ہوگا تو اس میں پیسہ بھی آجائیگا۔ خواتین کرکٹ لیگ کے آغاز سے پاکستان ویمن کرکٹ کو بہت فائدہ ہوگا، نوجوان کرکٹرز کیلئے تجربہ کار پلیئرز کیساتھ ڈریسنگ روم شیئر کرنا اہم ہے، زندگی میں آپ ہر موقع پر سیکھتے ہیں، کرکٹ میں بھی ایسا ہی ہے، مجھے دیگر لیگز کھیلنے کا موقع ملا جس سے میرا کھیل کافی بہتر ہوا۔ منیبہ علی کافی باصلاحیت پلیئر ہیں، وہ کافی آگے جائیں گی، امید ہے پاکستان میں سٹار کرکٹرز کو کھیلتا دیکھ اور بچیاں اس کھیل میں آئیں گی۔ پاکستان کیخلاف بہت کرکٹ کھیلی ہے، پاکستان کے ٹیلنٹ نے مجھے ہمیشہ کافی متاثر کیا ہے، پاکستانی پلیئرز میںٹیلنٹ ہے، اچھے مقابلے کی کمی ہے جو لیگ سے دور ہوجائیگی۔ پاکستان کی بائولنگ ہمیشہ سے اچھی تھی، بیٹنگ پہلے کمزور تھی، اب منیبہ اچھا کھیل رہی ہیں، امید ہے ویمن کرکٹ لیگ سے پاکستان کو اور بیٹنگ ٹیلنٹ بھی ملے گا۔