لاہور(سپورٹس رپورٹر) پاکستان سپر لیگ کے 29 ویں میچ میں پشاور زلمی نے اسلام آباد یونائیٹڈ کو 13 رنز سے شکست دیدی۔اسلام آباد کی ٹیم 180 رنز کے تعاقب میں 166 رنز پر آوٹ ہوگئی، فہیم اشرف نے 38 رنز کی  اننگز کھیلی جبکہ رحمان اللہ گرباز 33 رنز کیساتھ نمایاں رہے۔پشاور زلمی کے خرم شہزاد اور سفیان مقیم نے 3،3 کھلاڑیوں کو پویلین کی راہ دکھائی۔راولپنڈی  میں کھیلے گئے میچ میں پشاور زلمی نے پہلے بیٹنگ کرتے ہوئے 8 وکٹوں پر 179 رنز بنائے۔ زلمی کی جانب سے پہلی وکٹ جلد گرنے کے بعد محمد حارث اور بھانوکا راجاپکسا نے شاندار 115 رنز پارٹنرشپ قائم کی تاہم لنکن بلے باز 41 رنز بناکر وکٹ گنوا بیٹھے۔محمد حارث نے 39 گیندوں پر 79 رنز کی اننگز کھیلی جس میں 7 چوکے اور 5 چھکے شامل تھے، دیگر کھلاڑیوں میں کوئی بھی خاطر خواہ کارکردگی دیکھانے میں ناکام رہا، بابر اعظم کی جگہ کپتانی کرنے والے ٹام کوہلر کیڈمور 12، حسیب اللہ خان 10، عامر جمال 9، مجیب الرحمن 2 جبکہ جمی نیشم ایک رن بناسکے۔اسلام آباد یونائیٹڈ کی جانب سے حسن علی نے 3، شاداب خان 2 جبکہ فہیم اشرف، فضل الحق فاروقی ایک ایک وکٹ حاصل کرنے میں کامیاب ہوئے۔محمد حارث کومیچ کا بہترین کھلاڑی قرار دیا گیا۔گزشتہ روز دوسرے میچ میں کراچی کنگز نے لاہور قلندرز کو 86رنز سے شکست دے دی۔ کراچی کنگز نے لاہور قلندرز کو جیت کیلئے 197 رنز کا ہدف دیا تھا ۔ لاہور قلندرز کی پوری ٹیم 18.5 اوور میں 110 رنز بناکر آئوٹ ہوگئی۔حسین طلعت 25رنز بناکر نمایاں رہے۔ کراچی کنگز کے کپتان عماد وسیم نے ٹاس جیت کر پہلے بیٹنگ کا فیصلہ کیا تھا۔ کراچی کنگز نے 7 وکٹوں پر 196 رنز بنائے۔ محمد اخلاق 51 ، کپتان عماد وسیم 45، طیب طاہر 40 اور بین کٹنگ 33 رنز کیساتھ نمایاں رہے۔ زمان خان، حسین طلعت اور حارث رئوف نے 2، 2 جبکہ دلبر حسین  نے ایک کھلاڑی کو آئوٹ کیا۔  پلے آف مرحلے کے میچز کا شیڈول طے ہوگیا۔پی ایس ایل 8 پلے آف مرحلے میں 15 مارچ کو قذافی سٹیڈیم میں لاہور قلندرز اور ملتان سلطانز کی ٹیمیں کوالیفائر میں مدمقابل آئیں گی۔لاہور اور ملتان کا کوالیفائر میچ جیتنے والی ٹیم فائنل میں پہنچ جائیگی، 16 مارچ کو قذافی سٹیڈیم میں ہی ایلی مینیٹر ون کھیلا جائیگا جس میں پشاور زلمی اور اسلام آباد یونائیٹڈ کی ٹیمیں مد مقابل ہوں گی۔ ایلی مینیٹر ون ہارنے والی ٹیم ایونٹ سے باہر ہو جائے گی۔17 مارچ کو قذافی سٹیڈیم میں ایلی مینیٹر ٹو کھیلا جائیگا جس میں کوالیفائر ہارنے والی اور ایلی مینیٹر ون جیتنے والی ٹیمیں مد مقابل آئیں گی، پی ایس ایل 8 کا فائنل 19 مارچ کو قذافی سٹیڈیم میں ہو گا۔