اسلام آباد (خبرنگار) پاکستان مسلم لیگ (ن) نے پنجاب کی تمام نشستوں سے اپنے امیدوار کھڑے کرنے کا فیصلہ کر لیا۔ جبکہ پارٹی قائد نواز شریف نے کہا کہ انتخابات کے لئے ٹکٹ میرٹ پر دئیے جائیں گے اور نظریاتی ورکرز کو نظر انداز نہیں کیا جائے گا۔ ذرائع کے مطابق مسلم لیگ (ن) کے قائد و سابق وزیر اعظم محمد نواز شریف نے پارٹی صدر و وزیراعظم محمد شہباز شریف اور چیف آرگنائزر مریم نواز سے ٹیلی فونک رابطہ کیا۔ نواز شریف نے شہباز شریف اور مریم نواز سے پنجاب اسمبلی کے انتخابات کے حوالے سے تفصیلی گفتگو کرتے ہوئے انتخابی مہم بھرپور طریقے سے چلانے کی ہدایت کی۔ پارٹی ذرائع کے مطابق مسلم لیگ (ن) نے پنجاب کی تمام نشستوں سے اپنے امیدوار کھڑے کرنے کا فیصلہ کیا ہے۔ اس ضمن میں چیف آرگنائزر مریم نواز نے صوبے بھر کے امیدواروں کے چناﺅ کے حوالے سے اپنی سفارشات نواز شریف کو ارسال کر دی ہیں۔ ذرائع کا کہنا ہے کہ مسلم لیگ (ن) کے حتمی امیدواروں کا چناﺅ پارلیمانی بورڈ کی سفارشات اور انٹرویو کے بعد ہو گا۔ جبکہ مسلم لیگ (ن) کے قائد نواز شریف پارلیمانی بورڈ کی خود صدارت کریں گے۔
 نواز شریف/پارٹی ٹکٹ