لاہور(نامہ نگار) لاہور میںپی ایس ایل کرکٹ میچ کے باعث گزشتہ روز مختلف شاہراہوں پر ٹریفک جام رہی ۔ ٹیموں کی سٹیڈیم آمدورفت کے بعد بھی ٹریفک کنٹرول نہیں ہو سکی اور ٹیموں کی آمد اور روانگی کے بعد بھی کئی گھنٹے ٹریفک کی روانگی متاثر رہی۔فیروز پور روڈ ،گلبرک مین بلیووارڈ،مسلم ٹائون موڑ ،وحدت روڈ ، کینال روڈ ،جیل روڈ اور دیگر ملحقہ سڑکوں پر ٹریفک بری طرح متاثرہوئی۔پی ایس ایل میچ کے دوران ناقص منصوبہ بندی اور سٹیڈیم کے ارد گرد سڑکیں بند کرنے سے شہری ان علاقوں میں سفر کرنے سے مفلوج ہو کر رہ گئے ہیں۔سٹی ٹریفک پولیس ترجمان کے مطابق ٹیموں کی موومنٹ گزرتے ہی تمام ڈئیورشنز کو ٹریفک کے لئے کھول دیا جا تا ہے۔ مجموعی طور پر ایک ہزار سے زائد ٹریفک اہلکار روٹ ڈیوٹی سرانجام دے رہے ہیں جبکہ غلط پارکنگ کے خاتمے کے لئے 20 فورک لفٹرز، 3 بریک ڈاؤنز بھی تعینات ہیں۔