لاہور(سپورٹس رپورٹر)پشاور زلمی کے فاسٹ بائولر عامر جمال نے کہا ہے کہ لاہور قلندرز کے تجربے کا مقابلہ کریں تو ان کا تجربہ زیادہ ہے لیکن گراؤنڈ میں مقابلہ کچھ اور طرح سے ہوتا ہے۔ لاہور قلندرز کے پاس شاہین آفریدی، حارث رؤف اور راشد خان جیسے بائولرز ہیں، ہمارا پلان صرف لاہور قلندرز کو شکست دینے کیلئے ہو گا، مقابلہ کرنے کی بھرپور کوشش کریں گے، یہ ہمارے لیے سیمی فائنل میچ ہے۔ ہم ایک دو وکٹ گرنے کے انتظار میں تھے، ٹائم آؤٹ میں کوچ نے کہا کہ پلان کے مطابق کھیلیں اور اسی کے مطابق ہمیں ہیلز اور صہیب مقصود کی وکٹیں ملیں۔ میں بائولنگ آل راؤنڈر ہوں بائولنگ پر توجہ ہوتی ہے، بیٹنگ پر بھی کام کر رہا ہوں، شکر ادا کرتا ہوں کہ اہم میچ میں بہتر پرفارمنس ہوئی۔ فاسٹ بائولنگ جارحانہ انداز کا نام ہے، اس حوالے سے شان ٹیٹ سے بات ہوئی تو انہوں نے کہا تھا کہ تیز بائولنگ جارحانہ انداز میں ہوتی ہے۔ بابر اعظم نے اپنے بائولرز پر اعتماد کا اظہار کیا ہے۔