راولپنڈی‘ ملتان‘ لودھراں (آئی این پی‘ نوائے وقت رپورٹ) دارالحکومت اسلام آباد سے متصل شہر راولپنڈی میں پی ٹی آئی رہنمائوں اور کارکنوں کی گرفتاریوں کے لیے پولیس نے مختلف مقامات پر چھاپے مارے گئے۔ پولیس کے مطابق پی ٹی آئی راولپنڈی سٹی کے صدر عمران حیات کے گھر پر چھاپہ مارا گیا ہے۔ راولپنڈی پولیس کا کہنا تھا کہ سابق ایم پی اے راشد حفیظ اور ماجد حسین کے گھروں پر بھی پولیس نے چھاپے مارے ہیں، روات میں سابق ایم پی اے راجہ وحید قاسم کی رہائش گاہ پر بھی چھاپہ مارا گیا ہے۔  راولپنڈی پولیس کے مطابق ان چھاپوں میں کسی رہنما کی گرفتاری عمل میں نہیں آئی ہے تاہم 17پی ٹی آئی کارکنوں کو گرفتار کیا گیا ہے۔ تحریک انصاف کے کارکنان کے خلاف ملتان میں کریک ڈائون ہوا۔ پولیس نے 10 سے زائد کارکنان کو گرفتار کر لیا۔ پی ٹی آئی رہنما جاوید انصاری سمیت 10 کارکنوں کو امن و امان خراب کرنے کے الزام میں گرفتار کیا گیا۔ لودھراں سے بھی 10 کارکنوں کو گرفتار کر لیا گیا۔