لاہور (خصوصی نامہ نگار) بادشاہی مسجد لاہور میں رمضان المبارک کے دوسرے جمعۃ المبارک کے عظیم اجتماع سے چیئرمین مرکزی رؤیت ہلال کمیٹی پاکستان، خطیب وامام بادشاہی مسجد لاہور مولانا عبدالخبیر آزاد نے خطاب کرتے ہوئے کہا کہ رمضان المبارک نزول قرآن کا مہینہ ہے جو ہمیں صبر و استقامت اور وحدت کا درس دیتا ہے، یہ وہ مہینہ ہے جس میں اللہ نے اپنی پیاری کتاب قرآن حکیم فرقان حمید نازل کی جو ساری انسانیت کے لیے رشد و ہدایت کا سر چشمہ ہے۔ ہمیں چاہیے کہ ہم اللہ تعالیٰ کو منالیں اور ہم سب ملکر اللہ تعالیٰ سے معافی مانگیں۔ علماء  کرام اور عوام الناس ملکی سلامتی و تحفظ کے لیے افواج پاکستان کے ساتھ کھڑے ہیں، اللہ پاک اپنی مخلوق کی خدمت کرنے والوں کو پسند کر تا ہے، آئیں ہم سب ملکر مخلوق خدا کی خدمت میں اپنا کردار ادا کریں۔