لاہور‘ پشاور (نامہ نگار+ این این آئی) چھتیں گرنے سے 3 افراد جاں بحق ہوگئے۔ تفصیلات کے مطابق موچی گیٹ کے علاقے میں خستہ حال مکان کی چھت گرنے کے نتیجے میں 17 سالہ نوجوان شاہد منیر ملبے تلے دب گیا۔ اطلاع ملنے پر ریسکیو ٹیموں نے موقع پر پہنچ کر ملبہ ہٹا کر شاہد منیر کی لاش باہر نکال لی۔ پشاور کوہاٹ روڈ کے علاقے میں سحری کے وقت پاپڑ فروش مصری خان کے گھر کی چھت منہدم ہو گئی۔ ملبے تلے خواتین اور بچوں سمیت 5 افراد دب گئے۔ ریسکیو اہلکاروں نے ایک گھنٹے کے آپریشن  کے بعد تمام افراد کو ملبے سے نکال کر ہسپتال منتقل کر دیا۔ ملبے تلے دب کر مصری خان کی بیوی اور بیٹی جاں بحق ہو گئیں۔