لاہور(سپورٹس رپورٹر) ندا ڈار کو پاکستان ویمن کرکٹ ٹیم کا کپتان جبکہ مارک کولز کو ہیڈ کوچ‘سابق ٹیسٹ کرکٹر سلیم جعفر کو ویمن سلیکشن کمیٹی کا چیئرمین مقرر کیا گیا ہے جبکہ انکے ساتھ کمیٹی میں اسماویہ اقبال، مرینہ اقبال اور محتشم راشد بھی شامل ہوں گے۔سلیم جعفر ویمن ٹیم کے باﺅلنگ کوچ کے طور پر بھی ذمہ داریاں انجام دیں گے جبکہ توفیق عمر کو بیٹنگ کوچ اور محتشم راشد کو فیلڈنگ کوچ مقرر کیا گیا ہے۔چیئرمین پی سی بی مینجمنٹ کمیٹی نجم سیٹھی نے نئی تقرریوں کی منظوری دیتے ہوئے کہا کہ یقین ہے کہ ندا ڈار کی کپتانی، مارک اور سلیم جعفر کی رہنمائی میں پاکستان ویمن ٹیم کامیابی کی منازل طے کرےگی۔ندا ڈار نے کہا کہ پاکستان ٹیم کا کپتان مقرر ہونے پر فخر ہے۔ ایونٹس میں ٹیم کی قیادت کرنے کیلئے پرجوش ہوں۔ یہ ذمہ داری سونپنے پر پی سی بی کا شکریہ ادا کرنا چاہتی ہوں، ٹیم کو آگے لے جانے کی پوری کوشش کرونگی۔ندا ڈار نے بسمہ معروف کی بطور کپتان ٹیم کیلئے خدمات پر شکریہ ادا کرتے ہوئے عزم ظاہر کیا کہ وہ انکی میراث کو جاری رکھتے ہوئے اسی جذبے اور عزم کےساتھ ٹیم کی قیادت کرینگی۔ آنے والا سیزن مشکل ہونے والا ہے لیکن ہماری خوش قسمتی ہے کہ ہمارے کھلاڑیوں میں دلچسپ ٹیلنٹ موجود ہے، جس کے بارے میں مجھے یقین ہے کہ کورس کے دوران اس میں نمایاں بہتری آئےگی اور ٹیم کو مضبوط پرفارمنس پیش کرنے میں مدد ملے گی، بطور کپتان میرا مقصد نوجوان کھلاڑیوں کی حوصلہ افزائی اور رہنمائی کرنا ہے تاکہ وہ معیاری کرکٹر بن سکیں۔