مبینہ پولیس مقابلوں میں ایک ڈاکو ہلاک‘ ایک زخمی‘ 3 گرفتار
شیخوپورہ‘ فیروز والا (نمائندہ خصوصی+ نامہ نگار خصوصی+ نامہ نگار) تھانہ اے ڈویژن کے علاقہ گھنگ روڈ گلی نمبر10 میں پولیس تعاقب کے دوران ڈاکوئوں کی پولیس پر فائرنگ، جوابی فائرنگ سے ایک ڈاکو ہلاک، دوسرا زخمی، بتایا گیا ہے کہ دو ڈاکو شرقپور روڈ سے کار چھین کر فرا ر ہونے لگے تو پولیس نے تعاقب شروع کر دیا۔ ڈاکو مختلف علاقوں سے ہوتے ہوئے گھنگ روڈ پر آگئے تو پولیس نے چھینی گئی گاڑی پر فائرنگ کر کے اس کے ٹائر برسٹ کر دئیے تو ڈاکوئوں نے چھینی گئی گاڑی چھوڑ کر ایک اور شخص سے اس کی گاڑی چھین لی اور بوکھلاہٹ کے عالم میں تیزی رفتاری کے باعث قریبی کھمبے سے ٹکرا گئے۔ اسی دوران فائر لگنے سے ایک ڈاکو ہلاک جبکہ اس کا ساتھی زخمی ہوگیا۔ جس کو پولیس نے گرفتار کر لیا۔ ہلاک ہونے والے ڈاکو کی شناخت دلاور چیمہ کے نام سے ہوئی ہے، جو متعدد اضلاع کی پولیس کو قتل، اقدام قتل، منشیات اور ڈکیتی وچوری کی مختلف وارداتوں میں مطلوب تھا۔ جبکہ شاہدرہ کے قریب شہریوں اور پولیس نے مبینہ مقابلے میں تین ڈاکوئوں کو اسلحہ سمیت پکڑ لیا۔
