لندن +لاہور (نمائندہ خصوصی +این این آئی+ نیٹ نیوز) مسلم لیگ (ن) کے قائد اور سابق وزیر اعظم میاں محمد نواز شریف عمرہ کی ادائیگی کیلئے سعودی عرب پہنچ گئے۔ سابق وزیراعظم نواز شریف مسلم لیگ (ن) کے قائد ایک ہفتے سے زائد سعودی عرب میں قیام کریں گے اور وہ شاہی مہمان کے طور پر عمرہ کی ادائیگی کریں گے۔ نواز شریف کے ساتھ ان کی صاحبزادی مریم نواز بھی عمرہ ادا کریں گی۔ ان کے شوہر کیپٹن (ر) صفدر، دونوں بیٹیاں ماہ نور اور مہر النسائ، بیٹا جنید صفدر اور بہو عائشہ سیف بھی ساتھ ہوں گے۔ اس کے علاوہ ڈاکٹر عثمان‘ چودھری منیر‘ راحیل منیر‘ شیخ آصف اور مرزا جاوید بھی مریم کے ساتھ گئے ہیں۔ این این آئی کے مطابق ائرپورٹ پر مریم نواز کے بھائی حسین نواز نے استقبال کیا۔ خاندانی ذرائع کے مطابق نواز شریف اور مریم نواز سعودی شاہی قیادت سے ملاقاتیں بھی کریں گے۔ نواز شریف اور مریم نواز رمضان المبارک کا آخری عشرہ مکہ المکرمہ اور مدینہ منورہ میں گزاریں گے۔