لاہور(سپورٹس رپورٹر)پاکستان ٹیم کے نئے تعینات ہونے والے ہیڈ کوچ گرانٹ بریڈ برن نے کہا کہ یہ میرے لئے فخر کی بات ہے کہ پاکستان کی کوچنگ کا موقع ملا۔ پاکستان واپس آکر بڑی خوشی ہوئی ، پاکستان پہنچنے پر بڑا اچھا استقبال کیا گیا، میں پہلی بار 1990 میں نیوزی لینڈ ٹیم کے ہمراہ پاکستان آیا تھا پاکستان میں تین سال تک کوچنگ کی، جس کا تجربہ بڑا شاندار رہا۔ دوبارہ پاکستان ٹیم کی کوچنگ کرنا میرے لئے اعزاز کی بات ہے پاکستان ٹیم، مکی آرتھر اور دیگر کوچنگ سٹاف کے ساتھ کام کرکے اچھا لگے گا۔ نہ صرف پاکستان ٹیم بلکہ پورے پاکستان میں ہر جگہ بے پناہ ٹیلنٹ موجود ہے، میں پاکستان ٹیم میں مثبت تبدیلی لانے کی کوشش کروں گا۔