لاہور (نامہ نگار) مغلپورہ کے علاقے میں کینال روڈ پر کٹی پتنگ کی گلے پر ڈور پھرنے سے موٹر سائیکل سوار نوجوان شدید زخمی ہو گیا۔ نگران وزیراعلیٰ پنجاب محسن نقوی نے واقعہ کا نوٹس لیتے ہوئے سی سی پی او لاہور سے رپورٹ طلب کر لی ہے۔ مغلپورہ کے علاقے میں کینال روڈ پر بیجنگ انڈر پاس کے قریب 30 سالہ محمد ذیشان موٹر سائیکل پر جا رہا تھا کہ وہ اچانک کٹی پتنگ کی ڈور گلے پر  پھرنے سے شدید زخمی ہو گیا اور موٹر سائیکل سے نیچے سڑک پر گر گیا۔ محسن نقوی کا کہنا تھا  لاہور سمیت پنجاب بھر میں پتنگ بازی کے قانون پر سختی سے عملدرآمد کروایا جائے۔ لاہور پولیس ترجمان کے مطابق رواں سال اب تک پتنگ بازی ایکٹ کی خلاف ورزی پر 2671 ملزمان گرفتار کر کے ان کے خلاف متعلقہ پولیس سٹیشنز میں 2661 مقدمات درج کئے گئے۔