لاہور(سپورٹس رپورٹر ) پاکستان ٹیم کے وکٹ کیپر بیٹر محمد رضوان نے کہا ہے کہ نمبر ون میں ہوں یا بابر اعظم یہ اہم نہیں، اہم چیز نمبر ون پاکستانی کا ہونا ہے، ہم سب کا ایک ہی ہدف ہے وہ پاکستان کو نمبر ون ٹیم بنانا ہے۔ میچ کھیلتے وقت یہ نہیں سوچتے کہ سنچری شراکت کرنی ہے، جب فخر آوٹ ہوا تو سکور بورڈ پر 99 دیکھا تو سوچا کاش ایک اور رن کر لیتے، اس وقت ہمیں تیزی سے رنز بنانا تھے اس لئے سکور بورڈ پر دھیان نہ تھا، اللہ نے چاہا تو اگلے میچز میں سنچری پارٹنر شپ کرلیں گے۔ پہلے میچ کے مقابلے میں وکٹ نسبتا بہتر تھا مگر نئے گیند پر تھوڑا ٹھہر کر کھیلنا پڑا، کوشش ہوتی ہے کنڈیشن دیکھ کر ہی میچ کو آگے بڑھایا جائے، میچ کیلئے ہمارا پلان 70 فیصد کامیاب ہوتا ہے اور 30 فیصد غلطیاں ہو جاتی ہیں، کوشش یہی تھی کہ وکٹ نہ گرائیں تو اچھا ٹوٹل لگا سکتے ہیں۔ بابر اعظم کےساتھ کوشش ہوتی ہے کہ سٹرائیک روٹیٹ کرتے رہیں، ہمیں ایک دوسرے پر بہت بھروسہ ہے، ایک دوسرے کیلئے اپنی وکٹ گنوانے کو بھی تیار ہوتے ہیں، ہم ہمیشہ سکور کیلئے چانس لیتے ہیں، کسی کو ہوا میں اٹھانا بہتر لگتا ہے تو کسی کو گراونڈ شاٹ کھیلنا اچھا لگتا ہے۔
 پی ایس ایل سے پاکستان کو اچھے پلیئرز مل رہے ہیں، ہماری بیٹنگ دسویں نمبر تک ہے اس لئے یہ نہیں سوچتے کہ پیچھے کون ہوگا، اگر یہ سوچنے لگے کہ پیچھے کیا ہوگا تو اپنا کھیل نہیں ہو پائے گا۔ کسی ایک سیریز کو نہیں دیکھتے، یہ دیکھتے ہیں کہ نمبر ون کےلئے کیا کرنا ہے، جیت کے بعد اعتماد ملتا ہی ہے، ہم میچ بائی میچ جائیں گے، مجھے ٹیم سے امید ہے کہ ہم ضرور وائٹ واش کریں گے۔