فیصل آباد (نمائندہ خصوصی) لڑائی جھگڑوں کے واقعات میں فائرنگ سے خاتون سمیت چار افراد کو موت کے گھاٹ اتار دیا گیا جبکہ دو بھائیوں سمیت چھ افراد شدید زخمی ہو گئے۔ تفصیل کے مطابق وارث پورہ سے ملکھانوالہ روڈ پر خوشحال ٹا¶ن گلی نمبر دو میں گھریلو ناچاکی پر نوجوان نے فائرنگ کر کے اپنی سوتیلی ماں پینتالیس سالہ سمیرا بی بی زوجہ عبدالمجید کو قتل کر دیا اور فرار ہو گیا۔ تھانہ ٹھیکریوالہ کے علاقہ 77 ج ب ملاں پور میں عید کے دن دیرینہ دشمنی کا بدلہ لینے کے لیے مسلح ملزمان نے فائرنگ کر کے پچیس سالہ شبیر ولد باغ علی کو قتل کر دیا اور فرار ہو گئے۔ تھانہ سٹی جڑانوالہ کے علاقہ عثمان پارک میں سابقہ رنجش کا بدلہ لینے کے لیے اویس وغیرہ ملزموں نے اپنے مخالف سعید ساجد کے بیٹے فہد کو بیہمانہ تشدد کا نشانہ بنانے کے بعد فائرنگ کر کے قتل کر دیا اور فرار ہو گئے۔ پولیس نے پوسٹ مارٹم کے بعد لاشیں ورثاءکے حوالے کر دی ہیں۔ تھانہ سمن آباد کے علاقہ سمن آباد ریلوے پھاٹک کے قریب پرانی دشمنی پر مسلح ملزمان نے فائرنگ کر کے اپنے مخالفین پینتیس سالہ تنویر شریف اور تیس سالہ ظہیر شریف کو زخمی کر دیا، تھانہ منصور آباد کے علاقہ محلہ رمضان آباد میں نامعلوم ملزمان نے اندھا دھند فائرنگ کر کے پچیس سالہ ارسلان، اڑتالیس سالہ اعجاز اور پچاس سالہ نذیر کو شدید زخمی کر دیا اور فرار ہو گئے۔ تھانہ ٹھیکریوالہ کے علاقہ 74 ج ب میں نامعلوم ملزموں نے خنجر کے وار کر کے انور علی ولد فقیر حسین کو شدید زخمی کر دیا۔ زخمیوں کو تشویشناک حالت میں ہسپتال منتقل کر دیا گیا۔