لاہور ( سپورٹس رپورٹر) قومی کرکٹ ٹیم کے سابق کپتان اور لیجنڈری آل رائونڈر عمران خان نے کپتان بابراعظم کو شاندار بلے باز قرار دیدیا۔ مقامی ٹی وی چینل کو دیئے گئے انٹرویو میں سابق کپتان عمران خان نے کہا کہ طویل عرصے بعد بابراعظم کے روپ میں پاکستان کرکٹ ٹیم میں کوئی بلے باز دیکھا جس نے اپنی کارکردگی سے دنیا کو متوجہ کیا۔ بابراعظم کئی سابق کرکٹرز کے ریکارڈ کو پاش پاش کرنے کی صلاحیت رکھتا ہے، میں بیٹسمن کا تجزیہ بالر کی عینک سے کرتا ہوں۔ ایک کرکٹر میں تکنیک، سٹروک پلے اور مزاج کا ہونا بہت ضروری ہے جو بابراعظم میں پایا جاتا ہے۔گزشتہ سال نومبر میں عمران خان نے انکشاف کیا تھا کہ انہوں نے پاکستان کرکٹ بورڈ  کے اس وقت کے چیئرمین احسان مانی سے کہا تھا کہ وہ انہیں قومی ٹیم کا کپتان مقرر کریں۔واضح رہے کہ بابراعظم کو اکتوبر 2019میں سرفراز احمد کی جگہ کپتان مقرر کیا گیا تھا۔