میکسیکو ‘بس کھائی میں گرنے سے 11 خواتین سمیت 18 سیاح ہلاک، 33 زخمی
میکسیکو سٹی (اے پی پی) میکسیکو کی مغربی ریاست نیریٹ میں ایک ہائی وے پر سیاحوں کی بس الٹنے کے نتیجے میں کم از کم18 افراد ہلاک جبکہ33 زخمی ہو گئے۔ چینی خبررساں ادارے کے مطابق نیریٹ اسٹیٹ اٹارنی جنرل کے دفتر نے جاری بیان میں کہا ہے کہ تیز رفتاری کے باعث گاڑی گہری کھائی میں جا گری جس کے نتیجے میں11 خواتین اور7 مرد موقع پر ہلاک جبکہ 33 زخمی ہو گئے ہیں۔ ریاست جالیسکو کے گورنر اینریک الفارو نے تصدیق کی کہ سیاحوں کی بس وسطی جلیسکو میں تلجومولکو سے ساحلی مقام گویابیتوس جا رہی تھی اور اس میں سیاح سوار تھے۔
