لاہور(سپورٹس رپورٹر)چٹوگرام کے ظہور احمد چودھری سٹیڈیم میں واحد چار روزہ میچ کے تیسرے دن کھیل کے اختتام پر بنگلہ دیش انڈر 19 کو پاکستان انڈر 19 کیخلاف 105 رنز کا خسارہ اور سات وکٹیں باقی ہیں۔271 رنز کے خسارے پر اپنی دوسری اننگز کا آغاز کرتے ہوئے، بنگلہ دیش کے ابتدائی بیٹرمظاہر الاسلام بغیر کوئی رن بنائے آوٹ ہو گئے۔ عاشق الرحمان شبلی اور عادل بن صدیق نے دوسری وکٹ کیلئے 69 رنز جوڑے۔ عادل بن صدیق 26 رنز بنا کر وہاج ریاض کا شکار ہو گئے ۔ عاشق الرحمان شبلی نے 79 رنز بنائے۔دن کے اختتام پر بنگلہ دیش انڈر 19 کا 70 اوورز میں تین وکٹوں پر 166 رنز تھا۔ کپتان شریر ثاقب اور اکانتو شیخ بالترتیب 47 اور پانچ رنز بنا کر ناٹ آؤٹ تھے۔سات وکٹوں پر 364 کے اوور نائٹ سکور پر اپنی پہلی اننگز دوبارہ شروع کرتے ہوئے پاکستان انڈر 19 کی ٹیم 128.1 اوورز میں 420 رنز بنا کر آؤٹ ہوگئی۔ عبید شاہد نے 67 ‘علی اسفند نے 40 رنز بنائے۔ وصی صدیقی نے پانچ‘ اقبال حسین ایمن نے چار وکٹیں حاصل کیں۔