لاہور(سپورٹس رپورٹر)عمران بٹ کی قیادت میں پاکستان شاہینز کی نظریں دورہ زمبابوے میں فاتحانہ آغاز پر ہوں گی۔پاکستان شاہینز آج سے کویکوی سپورٹس کلب میں شروع ہونے والے چار روزہ میچ میں زمبابوے اے سے مقابلہ کرے گی۔ پہلے چار روزہ میچ کے بعد ایک اور چار روزہ اور چھ 50 اوورز کے میچز ہوں گے جو ہرارے اور موتارے میں 10 سے 27 مئی تک کھیلے جائیں گے۔پاکستان شاہینز 30 اپریل کو ہرارے پہنچی۔ پاکستان شاہینز کے کپتان عمران بٹ نے کہا ہے کہ ہماری تیاریاں اچھی جا رہی ہیں، ہم یہاں کی  کنڈیشنز سے ہم آہنگ ہونے پر کام کر رہے ہیں۔ کھلاڑی اپنی بہترین کرکٹ کھیلنے اور اس موقع سے بھرپور فائدہ اٹھانے کیلئے پرعزم ہیں۔زمبابوے اے کیخلاف سیریز ہمارے لئے ایک موقع ہے کہ ہم اپنی صلاحیتوں کو جانچیں۔ ہم اس تجربے سے سیکھنے اور ایک ٹیم کے طور پر بہتری لانے کیلئے کوشاں ہیں۔