لاہور (این این آئی) چیئرمین تحریک انصاف عمران خان گرفتار ہونے والے پہلے سابق وزیراعظم نہیں، ان سے پہلے نواز شریف، شاہد خاقان عباسی اور ذوالفقارعلی بھٹو نے بھی یہ دن دیکھا ہوا ہے۔ نواز شریف کو ایک یا دو بار نہیں بلکہ تین بار گرفتار کیا گیا۔ تفصیلات کے مطابق عمران خان سے پہلے اب تک 3سابق وزرائے اعظم مختلف مواقع پر گرفتار ہو چکے ہیں۔ نواز شریف کو مجموعی طور پر 3مرتبہ گرفتار کیا گیا۔ نواز شریف نے جیل بھی کاٹی، جلاوطنی بھی برداشت کرنا پڑی، عمران خان کے دور اقتدار میں ہی سابق وزیراعظم شاہد خاقان عباسی کو نیب کی جانب سے جولائی 2019ء میں ایل این جی ریفرنس میں لاہور سے گرفتار کیا گیا تھا۔ فروری2020 ء میں اسلام آباد ہائیکورٹ سے ضمانت ملنے کے بعد انہیں اڈیالہ جیل سے رہا کیا گیا۔ پاکستان کی سیاسی تاریخ میں سب سے پہلے گرفتار ہونے والے سابق وزیراعظم ذولفقار علی بھٹو تھے، جنہیں نواب محمد احمد خان قصوری کے قتل کیس میں گرفتار کیا گیا تھا۔ بعد میں عدالت نے اسی کیس میں انہیں پھانسی کی سزا سنائی تھی۔