اوکاڑہ (نامہ نگار) انڈوں کی ٹرے بنانے والی فیکٹری کے تالاب میں 5 افراد کام کرنے کے دوران گر گئے۔ 2 افراد جاں بحق جبکہ 3 افراد کو ریسکیو ٹیموں نے ہسپتال منتقل کر دیا۔ تفصیلات کے مطابق دیپالپور کے نواحی گاؤں 39 ڈی میں واقع انڈوں کی ٹرے بنانے والی فیکٹری کے پیپر پلپ تالاب میں 5 افراد گر گئے۔  ریسکیو نے 5 افراد بیہوشی کی حالت میں  تالاب سے نکال کر  ٹی ایچ کیو ہسپتال دیپالپور منتقل کر دیا۔ دو افراد دم توڑ گئے، جا ں بحق ہونے والے افراد کی شناخت مقصود ولد منظور 40 سال سکنہ 18/1L اور منگت ولد نامعلوم 25 سال کے ناموں سے ہوئی ہے۔ متاثرین میں فرحان ولد لیاقت 33 سال، شفقت ولد لیاقت 35 سال، علی ولد نامعلوم 18 سال شامل ہیں۔