اسلام آباد (خبرنگار خصوصی) پاک فضائیہ نے اپنے غازیوں اور شہدا کو خراج عقیدت پیش کرتے ہوئے 1965کی جنگ کے ہیرو ائیر کموڈور محمد محمود عالم سے متعلق ایک خصوصی پرومو جاری کیا ہے۔ ترجمان پاک فضائیہ کی جانب سے جاری اعلامیہ کے مطابق ایم ایم عالم نے 1965 کی جنگ کے دوران ایک منٹ میں بھارتی فضائیہ کے 5طیاروں کو گرانے کا شاندار کارنامہ سر انجام دیا۔ پاک فضائیہ کے مایہ ناز ہواباز نے اپنے F-86 طیارے میں پرواز کرتے ہوئے 5بھارتی لڑاکا طیاروں کو ایک منٹ سے کم وقت میں تباہ کیا اور گیارہ روزہ جنگ میں کل 9بھارتی طیاروں کو نیست و نابود کیا جو کہ آج تک ایک ناقابلِ شکست ریکارڈ ہے، آپ کی ان بہادرانہ خدمات کے اعتراف میں حکومت پاکستان نے آپ کو دو بار ستار جرات سے نوازا۔