لکی مروت(نامہ نگار)ضلع لکی مروت کے علاقے خیرو خیل پکہ میں گھر پرٹرانسمیشن لائن کے تار گرنے سے کمسن بچے سمیت 3 افراد جاں بحق اور 3 زخمی ہوگئے۔ موصولہ اطلاعات کے مطابق متاثرین کا تعلق ایک غریب گھرانے سے ہے اور زخمیوں کو مقامی ہسپتال منتقل کر دیا گیا ہے۔جاں بحق ہونے والوں میں رضی نامہ ،عمرہ اور 6 سالہ احمد اللہ شامل ہیں۔ زخمیوں میں محفوظ اللہ، کلثوم بی بی اور گل بیگم شامل ہیں۔اس واقعے نے پورے دیہی علاقے کو  غم کی لپیٹ میں لے لیا ۔ لوگ لاشوں اور زخمیوں کو ہسپتال منتقل کرنے کے لیے نعمت اللہ کے گھر پہنچ گئے۔ تحصیل کونسل غزنی خیل کے چیئرمین ذیشان خان نے واقعہ کا سخت نوٹس لیتے ہوئے پشاور الیکٹرک سپلائی کمپنی کے مقامی اور اعلیٰ حکام کوانکوائری کاکہا ہے۔انہوں نے متاثرہ خاندان سے ہمدردی کا اظہار کیا اور حکام سے کہا کہ حقائق سامنے لائیں تاکہ اس بات کا تعین ہو سکے یہ حادثہ تھا یا کسی کی غفلت تھی۔