یہ 2ماہ میں الیکشن نہیں کراسکتے، تبھی ہوں گے جب میں کرائوں گا: زرداری
لاہور (نوائے وقت رپورٹ) سابق صدر آصف علی زرداری نے کہا صبر کا وہ پھل ملے گا جس کا آپ کو اندازہ ہی نہیں، سارے دکھ درد دور ہوجائیں گے۔ لاہور کے بلاول ہاؤس میں سابق صدر سے پیپلز پارٹی کے ٹکٹ ہولڈرز نے ملاقات کی۔ سیاسی صورتحال اور آئندہ انتخابات پر تبادلہ خیال کیا گیا۔ آصف زرداری نے کہا کہ پیپلز پارٹی نے ہمیشہ جدوجہد کی ہے، کارکن صبر کریں۔ میں نے جیل میں معیشت پر بہت ساری کتابوں کا مطالعہ کیا ہے۔ ایسے حل دیئے جس سے ہمارے دور میں زرمبادلہ کے ذخائر 24 ارب ڈالر ہوگئے تھے۔ انشاء اللّٰہ معیشت کو سنبھال کر زر مبادلہ کے ذخائر 100 ارب ڈالر تک پہنچاؤں گا۔ فوج کا بڑا خرچہ نہیں خوامخواہ اس پر پرپیگنڈا کیا جاتا ہے۔ سیاست میں ہر چیز کو کرنے کا حل موجود ہے، جن کو سیاست نہیں آتی، ان کے پاس حل بھی نہیں ہوتا۔ اس لئے وہ ہونے والی چیز کو بھی نہیں ہونے دیتے۔ یہ 2 ماہ میں الیکشن نہیں کرا سکتے، الیکشن تبھی ہوں گے جب میں کراؤں گا۔
