سمبڑیال (نمائندہ نوائے وقت) گرمی میں شدت آتے ہی سمبڑیال وگرد ونواح میں بجلی کی غیر اعلانیہ لوڈشیڈنگ عروج پر پہنچ گئی ہے اور بغیر شیڈول کے گھنٹوں بجلی کی بندش کے دوران جہاں پر نظام زندگی مفلوج ہو کر رہ گیا ہے وہاں پر عیدالاضحی کی آمد سر پر ہونے سے متعلقہ کاروبار بری طرح متاثر ہوکر رہ گئے ہیں۔ اسی طرح طویل دورانیہ کی اچانک مسلط کردہ لوڈشیڈنگ سے شدید گرمی میں شہریوں کی زندگی اجیرن ہوکر رہ گئی ہے اور جہاں پر دن کوعوام شدید پریشانی کا شکار نظرآتے ہیں وہاں پر رات کے اوقات میں بجلی کی بندش کے دوران گرمی اور مچھروں کی بہتات کے دوران بالخصوص بوڑھے افراد، معصوم بچے راتیں جاگ کر گزار رہے ہیں۔ سول سوسائٹی، عوام نے ارباب اختیار سمیت چیف ایگزیکٹو گوجرانوالہ گیپکو سے صورتحال کا فوری نوٹس لینے کا مطالبہ کیا ہے۔