گوجرانوالہ (نمائندہ خصوصی ) سٹی سیکرٹری اطلاعات پیپلزپارٹی محمد صغیر بٹ نے پاکستان پیپلز پارٹی ٹریدرز سیل کے زیر اہتمام بینظیر بھٹو کی 70 ویں سالگرہ کی تقریب سے بطور مہمان خصوصی خطاب کرتے ہوئے کہاذوالفقار علی بھٹو شہید کے بعد جس طرح بے نظیر بھٹو شہید نے جمہوری تسلسل برقرار رکھا، پاکستان میں جمہوریت کو مضبوط کیا،شہید بی بی نے قیدوبند کی صعوبتیں برداشت کیں مگر اصولوں پر سمجھوتہ نہیں کیا ۔شہید رانی کی زندگی ہمارے لئے مشعل راہ ہے پوری دنیا میں شہید جمہوریت کی لازوال قربانیوں کو خراج تحسین پیش کیا جاتا ہے وہ عالم اسلام کی پہلی خاتون وزیراعظم تھیں۔ دنیا بھر کے حکمران اور سیاستدان شہید محترمہ کی جدوجہد بھری زندگی کو بطور ماڈل مطالعہ کرتے ہیں۔ بلاول بھٹو زرداری بھی اسی طرح جمہوری نظام کو مضبوط کرنے میں کوشاں ہیں،آئندہ بلاول بھٹو وزیر اعظم ہوں گے،پیپلز پارٹی کے منشور میں شامل ہے۔اس موقع پر ضلعی صدر ذوالفقار بھٹو، رانا محمد حنیف،اشرف مجید،محسن گجر ، چاند گجر، خواجہ صفی، راحیل شیخ، امان اللہ ڈار و دیگرکارکنان بھی موجود تھے۔