لاہور(سپورٹس رپورٹر) ایمرجنگ ویمنز ایشیا کپ ٹی ٹونٹی ٹورنامنٹ میں پاکستان ایمرجنگ اور بنگلہ دیش کے درمیان سیمی فائنل پیر کے روز گیلی آئوٹ فیلڈ کے سبب نہیں کھیلا جاسکا ۔ اس سے قبل انڈیا اے اور سری لنکا کے درمیان پہلا سیمی فائنل بھی ممکن نہیں ہوسکا ۔ اب یہ دونوں سیمی فائنل آج بروز منگل کے روز کھیلے جائیں گے۔ انڈیا اے اور سری لنکا کے درمیان پہلا سیمی فائنل پاکستانی وقت کے مطابق صبح 6 بجے جبکہ پاکستان ایمرجنگ اور بنگلہ دیش کے درمیان دوسرا سیمی فائنل پاکستانی وقت کے مطابق صبح ساڑھے 10 بجے کھیلا جائے گا۔یاد رہے کہ ہانگ کانگ میں بارش اور خراب موسم کے پیش نظر منتظمین نے سیمی فائنل میں ریزرو ڈے رکھنے کا فیصلہ کیا ہے ۔مسلسل بارش اور آئوٹ فیلڈ گیلی ہونے کے سبب اس ٹورنامنٹ کے گروپ مرحلے میں کھیلے گئے بارہ میں سے 7 میچز ایسے ہیں جو ایک بھی گیند کرائے بغیر ختم کرنے پڑے تھے۔گروپ مرحلے میں پاکستانی ٹیم  کے ہانگ کانگ اور انڈیا اے کے خلاف میچز بارش کی نذر ہوگئے تھے جبکہ اس نے  نیپال کو 9 رنز سے شکست دی تھی۔ٹورنامنٹ کا فائنل بدھ 21جون کو کھیلا جائے گا۔