عید قربان پر صفائی کیلئے بہترین انتظامات کئے گئے:فیصل ایوب
گوجرانوالہ(نمائندہ خصوصی )گوجرانوالہ چیمبرآف کامرس اینڈ انڈسٹری کے صدرشیخ فیصل ایوب، سینئرنائب صدر حمیس گلزار مغل اور نائب صدر عادل ندیم نے مشترکہ بیان میں عید الاضحی کے موقع پر صحت و صفائی کے مثالی انتظامات کرنے پرکمشنر گوجرانوالہ نوید احمد شیرازی،ڈی سی گوجرانوالہ،فیاض احمد موہل ڈی سی گوجرانوالہ اورایم ڈی ویسٹ مینجمنٹ کمپنی شاہد جوتہ کی بہترین حکمت عملی پر مبارکباد پیش کی ہے اور کہا ہے کہ ضلعی انتظامیہ نے مکمل کوارڈی نیشن کے ساتھ گوجرانوالہ میں عید الاضحی کے موقع پر قربانی کے جانور وں کی آلائشوں کو اٹھانے ،شہر کے اندر جانوروں کی خرید و فروخت پر پابند ی لگانے اور صحت و صفائی کے نظام کو یقینی بنانے کیلئے بہترین انتظامات کئے جس سے شہر کی خوبصورتی برقرار رہی اور آلائشوں و گندگی کی وجہ سے وبائی امراض پھیلنے کے خطرات بھی ختم ہو گئے۔ انتظامیہ کی اعلیٰ حسن کارکردگی سے صحت و صفائی وسکیورٹی کی حکمت عملی بہترین رہی ۔ گندگی کے خاتمہ اور صحت وصفائی کو بہتر بنانے کے ساتھ ساتھ امن و امان کو برقرار رکھنے کے سلسلہ تعاون کی فضاءنہایت خوش آئند ہے۔
