لاہور (نوائے وقت رپورٹ‘ این این آئی) یونان میں کشتی حادثے میں ملوث انسانی سمگلرز کا سرغنہ گرفتار کرلیا گیا۔ ایف آئی اے اینٹی ہیومن ٹریفکنگ سرکل گجرات نے ایک بڑی کارروائی کرتے ہوئے ملزم محمد سلیم سنیارے کو گجرات سے گرفتار کیا، جو یونان کشتی حادثے کے مرکزی ملزم آصف سنیارے کا بھائی ہے۔ ملزم نے متعدد پاکستانیوں کو غیر قانونی راستے سے یورپ بھجوانے کے لیے کروڑوں روپے بٹورے۔ ملزم کے خلاف 9 مقدمات ایف آئی اے گجرات سرکل میں درج تھے۔ گرفتار ملزم محمد سلیم سنیارا حوالہ ہنڈی کے ذریعے اپنے بھائی آصف سنیارے کو پیسے بھجواتا تھا اور یونان کشتی حادثے کے بعد روپوش ہو گیا تھا، جسے جدید ٹیکنالوجی کا استعمال کرتے ہوئے گرفتار کیا گیا۔ ملزم کا بھائی آصف سنیارا اس وقت لیبیا میں موجود ہے، جس نے لیبیا میں متعدد سیف ہاو¿سز بنائے ہوئے ہیں۔ ملزم سے مزید تفتیش کی جا رہی ہے۔ دوسری جانب ایف آئی اے انسداد انسانی سمگلنگ لاہور کی دیگر کارروائیوں کے دوران ریڈ بک کے انتہائی مطلوب اشتہاری سمیت 3 ملزمان کو گرفتار کرلیا گیا۔ اشتہاری ملزم حافظ فقیر اللہ انسانی سمگلنگ کے گھناو¿نے جرم میں ملوث اور اینٹی ہیومن ٹریفکنگ سرکل لاہور کو 5 مقدمات میں مطلوب تھا۔ ملزم نے متعدد شہریوں کو بیرون ملک ملازمت کی غرض سے لاکھوں روپے بٹورے اور بھاری رقوم وصول کر کے روپوش ہو گیا تھا۔ ایک اور کارروائی میں سعودی عرب ملازمت کے نام پر بھاری رقوم ہتھیانے والے 2 ملزمان کو گرفتار کر لیا گیا، جن میں عامر مقصود اور عمیر مقصود شامل ہیں۔ گرفتار ملزمان کے خلاف امیگریشن آرڈیننس کے تحت مقدمہ درج تھا۔ ادھر یونان کشتی حادثے میں زندہ بچ جانے والا پاکستانی گھر پہنچ گیا۔ 28 سال کا عثمان صدیق پولیس میں کانسٹیبل تھا۔ عثمان صدیق بہتر مستقبل کے لیے اپنے 4 دوستوں کے ساتھ اٹلی جانا چاہتا تھا۔ وہ گجرات کے نواحی علاقے کالیکی کا رہائشی ہے۔ میڈیا سے گفتگو کرتے ہوئے عثمان صدیق نے بتایا کہ کشتی میں 700 افراد سوار تھے جن میں 350 پاکستانی تھے۔ انہوں نے بتایا کہ 6 روز سمندر میں کشتی چلتی رہی، کوئی کنارہ دیکھا نہ کوئی جزیرہ، ایک کارگو جہاز نے رک کر پانی اور خوراک سے مدد دی۔ حادثے سے قبل ایک ہیلی کاپٹر آیا اور تصاویر لینے کے بعد چلا گیا۔ عثمان صدیق نے کہا کہ ہیلی کاپٹر آنے کے بعد ہم پر امید ہو گئے کہ اب ہمیں ریسکیو کر لیا جائے گا۔ رسی ڈال کر کشتی کو کھینچا گیا تو توازن بگڑ گیا اور کشتی ڈوب گئی۔ عثمان صدیق گھر پہنچ گیا۔
یونان حادثہ/ گرفتار