لالہ موسیٰ (نامہ نگار) پیپلزپارٹی کے مرکزی رہنما و وفاقی مشیر قمر زمان کائرہ نے کہا ہے کہ اتحادی جماعتوں میں سیٹ ایڈجسٹمنٹ کا فارمولا تاحال طے نہیں ہوا تاہم اس پر بحث مباحثہ جاری ہے۔ ان خیالات کا اظہار انہوں نے ڈیرہ کائرہ پر صحافیوں سے گفتگوکرتے ہوئے کیا۔ قمر زمان کائرہ نے کہا ہے کہ یہ الیکشن اسمبلی کی مدت پوری کرنے کے بعد ہونے جارہے ہیں اور الیکشن میں کوئی رکاوٹ نہیں ہے۔ ملک میں مسائل بہت زیادہ ہیں لیکن وسائل انتہائی کم ہیں‘ لیکن اس کے باوجود حکومت جو کام انتہائی ضروری ہیں وہ کرا رہی ہے۔ میرے حلقہ میں اربوں روپے کے ترقیاتی منصوبے جاری ہیں۔ اسی طرح پورے ملک میں کام ہورہے ہیں اور یہ کام ہوتے رہتے ہیں۔ انہوں نے کہاکہ گرمیوں کے موسم میں بجلی کی پرابلم معمول کی بات ہے لیکن اس کے باوجود میرے حلقہ میں بجلی کی جتنی سکیمیں ہیں اتنی کسی حلقہ میں نہیں، بے شمار ٹرانسفارمر اپ گریڈ کئے گئے ہیں اور کئے جارہے ہیں۔