حافظ آباد‘ فیروز والا‘ لاہور (نمائندہ نوائے وقت + نمائندہ خصوصی + نامہ نگاران) شیراکوٹ‘ شادباغ‘ نواب ٹاؤن اور ساندہ میں خواتین سے زیادتی کرنے والے 4 افراد گرفتار‘ حافظ آباد میں چار ملزم خاتون کو اغواء کر کے ایک کمرہ میں لے گئے جہاں ایک ملزم نے خاتون سے زیادتی کی جبکہ دوسرے  ویڈیو بناتے رہے۔ پولیس نے چاروں کے خلا ف مقدمہ درج کر لیا۔ سکنہ محلہ قاضی پورہ کی متاثرہ خاتون نے پولیس کو درخواست دیتے ہوئے الزام عائد کیا کہ ملزم علقش اور علی بھٹی اسے زبردستی گاڑی میں ڈال کر اغواء کر لے گئے جس کے بعد ملزم علقش نے اس کے ساتھ ایک کمرہ میں زبردستی زیادتی کی۔ جب اس نے مزاحمت کی تو ملزم علقش نے جسمانی تشدد کر کے اسے زخمی کر دیا، جس پر پولیس نے ملزمان کے خلاف مقدمہ درج کر لیا۔ فیروز والہ میں مختلف مقامات پر خاتون سمیت نو عمر لڑکے سے ملزمان زیادتی کر کے فرار ہو گئے۔ بتایا گیا ہے کہ جیون پور کے علاقہ میں اوباش نوجوان اشفاق نے محنت کش افتخار کے گھر داخل ہو کر اس کی بیوی کے ساتھ زبردستی زیادتی کی۔ پولیس نے مقدمہ درج کر لیا۔ جی ٹی روڈ کی آبادی ننگل میں نوجوان قاسم نے ساتھی کی مدد سے محنت کش کے نو عمر لڑکے  کو نشانہ بنایا۔ پولیس نے واقعہ کی رپورٹ درج کر لی۔ انویسٹی گیشن پولیس نے شیراکوٹ، شادباغ، نواب ٹاؤن اور ساندہ  کے علاقوں میں خواتین کو زیادتی کا نشانہ بنانے والے 4 ملزمان کو گرفتار کر لیا ہے۔ جینڈر سیل پولیس شیراکوٹ سے گرفتار ملزم فیاض، شادباغ سے گرفتار ملزم سفیر، نواب ٹاؤن سے گرفتار ملزم اطہر، ساندہ سے ملزم رضوان سے تفتیش کر رہی ہے۔ ڈی آئی جی انویسٹی گیشن عمران کشور نے باقی ملزمان کی گرفتاری کے لئے ٹاسک سونپ دئیے۔ ڈی آئی جی انویسٹی گیشن عمران کشور نے کہا ہے کہ پولیس پراسیکیوشن پارٹنرشپ کی مدد سے ملزمان کو قرار واقعی سزا دلوائی جائے گی۔